Til tross for dei ekstraordinære omstendene grunna koronaepidemien, har årets deltakande elevar og lærarar gjort ein stor innsats og levert prosjekta sine. Dette har gitt utfordringar mellom anna knytt til det å få gjort intervju og observasjonar. Det har også gjort samarbeidet i gruppene vanskelegare då det for mange er ei uvant situasjon å samarbeide over nett. Likevel imponerer nivået i rapportane som alltid, og i år har tema variert frå forsking på klima, til forsking på terror og høgreekstremisme, og på psykisk helse og kulturforskjellar

For sekretariatet er det alltid spennande å sjå oppgåvene kome inn frå skulane vi besøkte i desember og januar. Etter prosjektperioden har kvar skule ein eigen prosess der dei i fellesskap kjem fram til kva for tre oppgåver som skal sendast inn til Holbergprisen i skolen sin jury . Totalt 55 elevrapportar er sendt inn til juryen, og i dei komande vekene er det juryen som avgjer kva for 3 oppgåver som blir finalistar. Vanlegvis ville dette blitt avgjort på eit jurymøte i Bergen, men grunna smittevernstiltaka vil dette møtet i år bli gjort digitalt. Juryen anerkjenner at årets elevar har møtt ein ekstra utfordrande situasjon i år, men vil også i år som i tidlegare år sjå etter nyskjerrigheit, originalitet og erfaringsbasert kunnskap i elevrapportane. Les gjerne intervju med juryleiar Stine Helena Bang Svendsen om hennar forsking og kva ho ser etter i elevrapportane.

Også den tradisjonelle Holbergveka vert i år avlyst. Det betyr at den tradisjonelle feiringa av skuleprisfinalistane ikkje kan skje på same måte som tidlegare år. Mellom anna betyr dette at den tradisjonelle seremonien der kunnskapsministeren annonserer årets 1., 2., og 3., pris på Bergen katedralskule, utgår. Det leggast difor opp til eit digitalt arrangement i etterkant av jurymøtet der årets 1., 2., og 3., pris annonserast. Det planleggast også arrangement til hausten der elevfinalistane vil bli hedra i Bergen.